Greenwaymasjid

By: Shamshad Khan

Me datën 6 Nëntor 2011, qindra njerëz të komunitetit mysliman Shqiptarë Amerikan të Arizonës, u mblodhën në qendrën Foothils Recreation Center të qytetit Glendale, për faljen dhe ligjëratën e Kurban Bajramit.

Këtë rrallë, ndryshe nga herët e tjera, qendra Islame ka marrë me qira sallën e sporteve, ku më shumë njerëz kishin mundësi të falen.

Para faljes së namazit të Kurban Bajramit, Imam Didmar Faja mbajti ligjëratën e rastit në gjuhën shqipe. Më pas fali namazin e Kurban Bajramit dhe mbajti Hutben e rastit duke e filluar atë me lutjet, falënderimet dhe lavdërimet ndaj Zotit në gjuhën Arabe dhe pastaj në atë angleze. Mes të tjerash Imami u ndal në disa mesazhe kryesore që përmban kjo ditë e madhërueshme. Ai, duke folur rreth harmonisë që duhet jetë midis besimtarëve, përmendi që nuk është e logjikshme të qëndrosh para Qabes, ose në ç'do faltore të Zotit, në harmoni me myslimanë të tjerë, duke përmbushur qëllimin e krijimit, gjënë më të rëndësishme, adhurimin, dhe kur je jashtë të zihesh, të mashtrosh ose të keqtrajtosh myslimanët. Për ç’ka? Thjesht për interesin e një fitimi më të madh material, një status më të lartë, ose për egoizëm. 

Imami gjithashtu përmendi se ngjarja e Hz. Ibrahimit (a.s.) dhe djalit të tij Hz. Ismailit (a.s.) është një ndër shembujt më të bukur të sakrificës dhe durimit.
 
"Një pikë tjetër shumë e rëndësishme, - shtoi ai, është respektimi i grave dhe mirësjellja ndaj tyre. Për besimtarët, pjesë e Haxhit është dhe ecja e përshpejtuar midis Safasë dhe Mervasë, në shenjë nderimi për gruan e Hz. Ibrahimit (a.s.), e cila shkoi shtatë herë nga njëra kodër në tjetrën, për të gjetur ujë për djalin e saj të vogël Ismailin (a.s.). Ai nderim nuk duhet të mbesë vetëm thjeshtë si traditë fizike ecja midis dy kodrave, por të kalojë në jetën e përditshme, duke bërë besimtarin të mirësjellshëm ndaj femrës. Gjithashtu dhe gruaja myslimane duhet të merret dhe më shumë me edukimin e brezave të së ardhmes, që shpresojmë të jenë nga ata që mbrojnë të vërtetën, në ç’do kohë dhe vend.

Më pas, të pranishmit u përshëndetën me njëri tjetrin duke i uruar "Gëzuar Bajramin".